الشيخ امام وهبت عمري للامل

وهبت عمري للأمل ولا جاشي

وغمرت غيطي بالعرق ما عطاشي

ورعيت لمحبوبي هواه ما رعاشي

والليل عليّا طويل ..

وأنا العليل ..

موجود دوا بس الطبيب ما رضاشي

والصبر فين؟!

الصبر فين يا سنين طوال وليالي

عيني على الجمل الأصيل العالي

لمّا ينخ بحمل من أحمالي

لكن في كل صباح ..

بانسى الجراح ..

وانقش بفاسي ع الغيطان موالي

يا ليل يا عين ..

يا ليل يا عين يا أرض يا معزوقه

يا كاشفه من شوقك خطوط مشقوقه

لما حضنتك والبذور مرشوقه

غنيت وفي المغنى فرضي ..

للسمره أرضي ..

هيَّ اللي باقيه ع الزمن معشوقه

والعشق زين ..

العشق زين بس الهموم سبّاقه

والشوف حديد بس الغيوم خنّاقه

والانتظار للوعد نار حرّاقه

امتى تطول العيدان ..

دا من زمان ..

مشتاق أنا والحلوه مش مشتاقه

والذل شين ..

الذل شين والأرض بنت عفيه

يوم الحصاد وعروسه متحنيه

وإن شفتها بالقمح متغطيه

ح افرش عبايتي واقابل ..

أم السنابل ..

وح اضم أملي بعد شوق بعنيه

وبالإيدين ..

وبالإيدين المعروقين يا مناجل

أطوي ظلامي بالصباح العاجل

وانزل بشومتي ع الغراب الحاجل

ويا يبقى شغل وغنا ..

طول السنه ..

يا تبقى ثوره في البلاد ومراجل

والوعد دين ..

الوعد دين ..

********

الشيخ امام بلح ابريم

 زهر الجناين طرح
والعطر مش واحد
مع ان اصل الشجر
طالع فى غيط واحد
والحب لما انبدر
مسقى بماء واحد
عجبي على فرعين
كان اصلهم واحد
واحد غرز فى الطين
واللى سرح .. واحد
والورد لما انقطف
يا رب يا واحد
ريحت بيه الوفات
واللى تعب .. واحد